「Pure你女仔人家又細細粒，竟然有大巴牌？」Moving說。
「人不可以貌相嘅。」Pure笑了笑。
「咁又係，Moving你夠唔似殺過人啦。」我說。
Moving做了個沒所謂的動作，但後方旋即傳來阿朱的尖叫：「殺過人？」
「係呀，人不可以貌相吖嘛。」Moving說。
「Moving，我覺得你好好人，一啲都唔似殺過人。」Pure對他微笑著。
我翻了個白眼，道：「行返去旅遊巴嗰邊之前，我想同Moving單獨傾一陣。」
「吓？你哋兩個係唔係有咩瞞住我哋？你哋係唔係有陰謀？」阿朱說。
「係囉，有咩唔可以喺度講？」Moving問。
我看了看他，然後道：「我想問Moving一啲私人嘢。」
「哥哥，私人嘢！」花花插嘴說。
「有咩私人嘢？我份人坦蕩蕩，有咩呢度問啦。」Moving說。
「嗱，你話問架咋！」我說。
「嗱，你話問架咋！」花花模仿著說。
「問啦！」Moving手叉著腰道。
「雖然你救過我，而且我都覺得你係好人，但始終呢度又報唔到警，我要保障花花、小真佢哋安全，我想知你……」我猶豫著應怎樣說下去。
「講咁多做乜？有屁就快啲放。」Moving皺著眉頭說。
「我意思係……嗯，一陣如果有警察追你，費事傷及良民啫。」
「放心，如果有警察，我會自首。」他聳聳肩說。
我深吸了一口氣道：「咁，重有，你……」
「男人老狗你都算煩，講嚟講去，你都係驚我係變態殺人狂，驚我殺埋你哋啫。」他說罷搭著我的肩膀，露出了一個陰險的笑容。
我猛地甩開了他，卻見他的笑容突然由陰險變成苦澀。
他苦笑著說：「有頭髮有邊個想做熾哥呀？」
「算啦，阿源，可能Moving唔想提起呢！」Pure就。
「咳咳，聽你哋對話，即係呢位Moving坐過監、殺過人，我諗講清楚好啲囉！」阿朱這時插嘴問。
Moving點了點頭：「得啦，我明嘅，同個殺人犯一齊，的確係唔太安心。」他頓了一頓道：「簡單講，我殺咗我老豆。」
「殺……殺咗你老豆？」阿朱尖叫起來。
「嗰日返到屋企，佢又飲到爛醉，而且……而且重打到我阿媽瞓咗喺度。」Moving以極低沉的聲線簡短地說出這件事，似乎在壓抑著自己的情緒。
「明啦，Moving，對唔住。」我拍了拍他，示意他不用再說下去，不如為何，我想起抛棄了母親、我和花花的父親。
因為Moving說的話，眾人一時間沉默下來，拖著沉重的步伐向我們早上乘搭的旅遊巴士走去。我和Moving走在最前方，不消一會已到了旅遊巴士車門前。
當Pure跟著過來坐上了駕駛座時，她驚叫了一聲：「冇車匙嘅！」
「咁大鑊！」我和Moving異口同聲地說。
「點算呀？點算呀？」阿朱尖叫著。