「咁多架車，我就唔信其他都冇車匙。」Moving抛下這一句跑了下車，我和偉哥也快步跟了下去，繞過前車車門前的男屍，我突然剎停了腳步。
「Moving！偉哥！」我大叫他們。他們也停了下來不解地看著我。
「呢度……少咗好多旅遊巴士……」我疑惑地說著。
本來一眼看過去還未計轉彎後的那十多輛旅遊巴士，現在卻只餘下三輛。
「嗯？又係喎。唔通有人同我哋一樣開車走咗？」Moving問。
我點了點頭道：「頭先我哋落車入商場，到行出嚟去巴士站，我哋一直都冇留意啲旅遊巴士，可能就喺嗰段時間，有其他好似我哋咁無啦啦嚟咗呢度嘅人開車走咗。」
「咁都唔奇，又冇巴士、的士，偷車走都唔奇。」偉哥說。
「嗯，我哋都係冇辦法先決定偷車。」我點著頭說服自己。
「喂！有啦！」Pure的叫聲在後面傳來，只見她從駕駛座的車窗伸出了右手揮動著，手上似乎拿著車匙。
我們三個立即跑回去，「點解突然間有嘅？」Moving問。
「喺地下，重有張奇怪嘅紙包住，你哋睇下！」Pure攤開雙手，右手拿著車匙，左手拿著一張皺巴巴的紙。
「茶記外賣紙有咩奇怪？」偉哥瞄了瞄道。
「你睇下角落頭？」Pure說，這時我們才留意到，角落頭用細小的字體寫著：「逃獄吧！」
「逃獄？即係講緊我？」Moving指了指自己。
「但係條車匙應該係個司機留低，唔通個司機識Moving？」Pure說。
「點都好，我哋快啲開車走啦！」我說。
「冇錯！Move！Move！」Moving突然發司號令般高聲喊著。
「出發！」隨著Pure的叫聲，旅遊巴士徐徐開出，我們也都趕緊找空位坐了下來。
「哥哥！坐呢度！」花花在後面叫我。
我起身走過去，發現她原來坐了在來屯門時坐的座位，其他人如小真、電筒男、敏敏等都一樣。
「我今次可以坐你旁邊未？」我笑著對花花說。
「可以呀！」
當我坐下來時，我的腦海突然閃過了一個奇怪的畫面，是我撿到的那張座位表的畫面。
我好像忽然想到了甚麼，為了證明自己的猜測，我從背囊中拿出那張座位表核對，「呀！」我不禁大叫了起來！
「呀！」花花也跟著我叫。
「請保持安靜。」電筒男突然說。
「咩料呀你？」Moving轉身過來問。
我禁不住拿著座位表走上前向他展示，我指著其中一個交叉，道：「呢個係我嚟屯門時一開始坐嘅位！」
Moving瞄了一眼說：「咩意思？」
「我本來係坐呢個位，但係花花中途叫我坐後面呢個位。」我指著另一個空白沒有交叉的座位。
這時偉哥和阿朱都哄了過來問：「即係點？」
「我啱啱睇過，花花佢哋坐嘅位都係冇交叉嘅，而其他被人捉走咗嘅家長、屋企人等等，都係坐有交叉嘅位。」我急速地解釋著。
「你話有人被人捉走咗？」阿朱問。
「係，詳情我一陣先講，總之我懷疑因為我調咗位，而啲制服佬係睇住座位表捉打咗交叉嘅位嘅人，所以我避過一劫，重有，打咗交叉嘅位都係病患嘅家長同屋企人坐嘅。」我壓低聲音道。
「但係Pure都冇事喎，佢又調咗位？」偉哥問。
「當時佢縮低咗，可能啲人見嗰個位冇人又冇特別去搵佢。」Moving撫著自己的下巴道。
「即係話，一開始就定好咗要捉走邊個。」偉哥說。
雖然座位表的交叉之謎好像解開了，但是我們都仍想不通為甚麼那班穿制服的人要這麼做。如果我當時也被人捉走了，我現在會在哪裡？會不會已經死掉？
「嘰！」突然，Pure急剎停了旅遊巴士。