回到家中，我吃過媽子留下的飯菜，便回房攤在床上打開電腦，「噠噠噠……」鍵盤的聲音在細小的房間中顯的額外響亮。
「大佬……」弟弟的聲音在上格床傳來。
「未瞓咩？」
「未呀……」他的聲線聽來滿有心事。
「嗯……」
「你係唔係要搬？」
「係呀！費事咁迫！」
「其實應我搬先啱嘅。」
「傻仔！你人工都唔好得過我幾多，大個仔啦，有老婆有仔，你要使錢大把機會呀！」
「嗯......多謝大佬！」
「超！男人之家唔好咁婆媽！重要以後我有自己天地，唔使同你迫！」
這小子沒有回應，過了一會，他輕輕的鼻鼾聲便響起了。
我繼續在租盤網站瀏覽著，想不到在九龍那邊的租盤也不是便宜很多，搬出去住？似乎我這個想法真有點天真。
我心中納悶不已，走到客廳，老豆正在看報紙，我一屁股坐在梳化上開始打起機來。
「點呀Fred仔，有煩惱呀？」老豆用腳指篤了篤我。
「冇呀！冇事！」我眼看著屏幕道。
「唉，你睇你，識唔識打機架？好似你老母一樣咁蠢，都冇我嘅真傳！」
「哇！咪畀你老婆聽到，飯都冇得畀你食。」
「鎖你！鎖你！唔好話畀你老母知……係呢，你話搬，有冇揾樓呀？」老豆盤膝坐在梳化上。
「有呀……剛睇咗東大街嗰邊個單位，都……都唔錯架！」我不想讓他擔心，只好這樣說。
「講嚟聽下，有幾好呀？」
「平囉！四千幾蚊租，有獨立廁所架！」
「獨立廁所？四千幾？傻仔你唔係去租劏房下哇？」他突然坐直了身子。
「係套房，唔……唔係劏房。」
「咪住先，東大街嗰邊嘅劏房？」老豆突好像想起了甚麼。
「係呀，做乜？」
「之前咪有單嘢個男人喺嗰邊有間劏房殺咗條女，重分埋屍添，可能有鬼先咁平！」他靠近我，在光線影響下看來像個男版龍婆般，並壓低了聲線。
「唔啦係啩，嚇我呀老豆？」我想起那劏房牆上確有一些奇怪的褐紅色污漬。
「咪住劏房啦衰仔，我哋迫迫地都住到，慢慢揾！」
「得啦，我會諗架啦！」
老豆坐多了一會便拍一拍我的肩膊，然後入房睡了。
我也回房去打開電腦，搜尋老豆剛說的兇殺案，但卻沒有找到任何資料，老豆一定是騙我吧？
我抱著懊惱的心情睡去，因為睡得不太好，第二天一早便回到公司。
「喂，廢哥仔！」Lyle一手搭著我的肩膊。
「咩料？」我甩開了他。
「有冇考慮同我分租呀？」
「唉……屯門喎大哥！返工幾遠呀！」我沒有理他，打開電腦開始「扮工」。
「屯門人返工一定係坐村巴，話咁快就到啦！」
「唉……」
「唉咩吖，$2500租乜都抵啦！」
「$2500？咁平？」聽到這個價錢，我不禁雙眼發光。
「一共$5000租，一人$2500囉！有成300尺架！計埋車錢都抵啦！」
「有冇咁平呀？鬼屋嚟架？」
「殊！」Lyle凝望著我，陰森地哄了過來。