昨晚Kinki問：「你平時鍾意做啲咩架？」
Lyle竟代我答：「寫作同埋享受人生。 」（WTF！甚麼享受人生？）
「即係......？」
「飲下紅酒，睇下歌劇咁。」（我對歌劇根本一曉不通！）
「吹牛！」（那Lyle還說自己是溝女大王，Kinki一看就知他「吹牛」，看來Kinki不會再理睬Lyle吧！）
「你可以唔信嘅，咁你有咩嗜好架？」
「我鍾意唱歌、睇書。」（想不到Kinki面對「吹牛大王」，仍會繼續聊下去。）
「咁你一定好鍾意我寫嘅故事。」（這樣說會不會太自大了......）
「嗯......我係你忠實讀者，你寫嘅故事好緊張刺激呀！」
「其實，我比較喜歡寫愛情故事。」
「係？但點解唔見你貼出嚟畀大家睇？」
「我只會為我深愛嘅女人寫愛情故事，亦只有佢先可以成為呢個故事嘅讀者。」（Lyle你會不會太噁心......）
「咁你女朋友真係好幸福呀！」
「可惜，佢已經眼癌死咗。」（What？甚麼眼癌？天國的雞批嗎？）
「對唔住，提起你嘅傷心事了。」
「唔緊要，我都應收拾心情，雖然佢永遠喺我心入面。」
「你真係好長情呀！好欣賞長情嘅男人！」
「欣賞好啦！千祈唔好愛上我！」
「點解？」
「因為我一旦愛上一個人，我就會錫到佢燶，將佢縱壞。」（Lyle，這是甚麼爛對話......想起這是以我的名義說出，真羞愧得無地自容）
「嘻嘻......」
「唔好笑，我係認真嘅。你唔怕嘅，可以試下。」
「哈！你都幾口花花！不過我鍾意！」
「不過我鍾意」？ 她喜歡我嗎？不， 她喜歡假扮我的Lyle嗎？
對話只來到這裡，Lyle當時應是不小心睡了，所以沒有回覆。我感到自己的血壓上升，我在鍵盤上大力地敲打著，向Kinki發出了一個訊息：「對唔住，尋晚同你傾偈嗰個係我同屋，你唔使理佢架。」
然後我放下電腦，感到自己有那麼一秒動了殺機，我猛力抽著Lyle的衣領：「起身呀，你條粉腸！」
Lyle驚醒了，下意識地用手阻擋著面的前方：「咩料咩料？唔好打面！」
我當然不會真的打下去，我放開他，怒氣沖沖的換過衣服便出門去坐村巴。
不過早上的村巴只有一班，所以最後Lyle還是趕上了這班車，還厚顏地坐我旁邊。
「廢兄唔好嬲啦！玩下啫。」
我默不作聲，合上眼裝作睡了。
「我氹得個Kinki不知幾開心，而且我肯定佢對你係有啲意思，或者應該話有一定程度嘅好感。」
他見我仍沒有回應，似乎很沒趣，嘀咕著：「都係想幫你脫毒啫。」
說真的，以前跟Mable開始，也是她做主動去結識我，我從來都不太懂跟女生相處，也難怪Lyle認為我需要脫毒......