Alexendra拖著我的手，一臉擔心地問：「你近來做咩成日疑神疑鬼？」
我正想向她解釋，卻有一把女聲在我耳邊大吼：「阿廢！」
「呀－－！」我掩著耳蹲了下來。
「阿廢！」「阿廢！」「阿廢！」「阿廢！」Alexendra和那女人的聲音交替著叫我。
我蹲在地上不停喘著氣，試著努力令自己冷靜下來。
終於，不知過了多久，耳邊只餘下Alexendra的聲音，我抬起頭，Alexendra緊張地看著我，其他路人也好奇地圍觀著。
我用力捉著Alexendra的手借力站起來，慢慢從嘴裡吐出一句說話：「Alexendra，陪我去搵個人。」
我拉著她鑽進港鐵站，剛才我蹲在地上時，突然想起之前的同事Charles；Charles在幾年前被殺後，我公司的同事曾說見過或感到過Charles的靈體，最後我們找到了一位趙師傳，她到公司做了法事後，Charles就沒有再出現了。
我在車廂急急向Alexendra解釋要去找趙師傅，但她卻憂心地說：「會唔會去睇醫生好啲？」
我知道Alexendra一向不相信鬼神，可是我對自己的精神狀態很有信心，我堅定地說：「我想搵趙師傅，如果試過唔得，我會去睇醫生。」
她見我如此堅持，也只點頭跟著我走。
我們來到一幢唐樓，沿著陰暗的樓梯走上去，「咯咯咯」，我敲了敲門。
沒有人應門。
正當我們想離去時，「咔」，是打開門鎖的聲音。
一個廿多歲，一身旺角潮流打扮的女生出現在眼前，她看來很眼熟，但我一眼就認出她不是趙師傅。
「請問趙師傅喺唔喺度？」我問
「請入嚟。」
她欠了欠身讓我們進去，就在這時，我看清她的容貌，這個女生曾和趙師傅一起來我公司的，也許是助手之類吧？
屋內昏昏暗暗的，前方一個拜神櫃，旁邊一張老舊的大桌子，跟我上次來時一模一樣，就在這時，一個穿著黑袍的女生在左面的走廊急步走了出來，這就是趙師傅。
她一眼就把我認出，更叫得出我的名字：「你係……阿廢？」
「趙師傅你真好記性。」
「你揾我有事？」她打量了Alexendra一下。
「嗯，我最近好似撞嘢。」
請過嚟呢邊坐。她走到桌子後坐下，指示我們坐在對面，而方才開門的女生，則探頭探腦站在我們後方。
趙師傅望了她一眼：「Suki，坐埋過嚟啦。」然後她轉身向我們說：「呢位我助手。」
待Suki也坐好，我便開始把我這陣子遇到的事一一道來，由於Alexendra也是第一次聽，她的臉上不無驚訝之色。
趙師傅十分冷静地聽完我的經歷，道：「我須要問你一啲問題。」
「嗯。」
「你覺得個靈體同你有冇關係？例如你曾經有朋友，親戚係女性而又過咗身，而你認為佢可能有事要揾你？」
我想了一會，道：「應該就冇。」
「你最近心情點？」她問。
雖然這問題聽來很奇怪，但我還是仔細想想然後回答道：「冇乜特別，近來都幾開心。」
「你近半年生活上有冇咩變化？」她又問。
「嗯，我搬咗屋，同埋開始拍拖。」我跟Alexendra對望了一眼。
「點解搬屋？奇怪嘅事係搬屋後先出現？」
「因為我細佬結婚，咁佢哋一家三口搬入嚟住，我唔想太迫咪搬。至於奇怪嘅事，係呢幾日先發生。」
「因為靈體有時會化身成唔同樣，你見到嘅女鬼，佢個樣、衣著或動作，會唔會似你識嘅某一個人？」
「唔會，完全唔識。」的確，在我認識的人中，連半點像的也沒有。
「明白。」她從衣袖裡拿出一粒石，對我說：「你袋住佢，石不離身，如果再有怪事，先再打電話畀我。」