吃過飯後，我們又繼續洗樓，我、Alexendra和呂瑰乘電梯來到興盛樓11樓，呂瑰突然開口說：「我覺得……好怪！」
「吓？」我疑惑地問。
「我覺得阿廢就喺呢度。」她說。
「點解？都未開始問。」我問。
「係直覺。」她回答。
「女人嘅直覺好準！可能我哋真係好快搵到阿發。」連Alexendra也這樣說。
「唓！如果直覺真係咁勁，點解唔一開始就用直覺感應下阿發喺邊度，等大家唔使逐層搵？」我嘀咕著。
Alexendra和呂瑰幾乎是同一時間瞪著我說：「講你都唔會明。」
我一臉無奈道：「咁感應下阿發喺呢層邊間屋得唔得呀？」
呂瑰沉默了一會，才開口說：「感覺唔到。」
我沒有理會她倆，逕自走到面向電梯的巷子去，「踏踏踏踏」，一個拄著拐杖的阿婆身影在後樓梯慢慢走了上來。
「嘩！」我不知為何驚叫了一下。
「咩事？」Alexendra問。
「呼……冇事！畀個阿婆嚇親。」
「阿婆你都驚？」呂瑰說。
「當日你出現時又係喺個後樓梯轉出嚟，而且……個阿婆有電梯唔搭，走去行樓梯，係唔係好怪？」我壓低聲線道。
話剛說完，那個阿婆卻開口說：「後生仔，嚇親你呀？」
我伸直了腰板尷尬地道：「唔係……呀！你咁都聽到嘅？哈哈哈哈！」
「阿婆隻耳仔好靈！我日日都行樓梯，想強身健體！」阿婆說。
這時我看真一點阿婆的容貌，她臉上滿是皺紋，嘴唇抿著看來應都沒有牙齒了，從外貌上看，似乎她應有八十歲了。
「佢把聲………」呂瑰在我身後顫抖著聲線，道：「阿廢！」
「咩話？阿發唔係男人嚟嘅咩？」Alexendra輕聲說。
「唔係……」呂瑰已淚流披面。
「你係唔係玩嘢？」我不禁說，阿發原來係女人？
「後生仔，咩玩嘢呀？你講我呀？」阿婆慢慢走到自己的家門前，說：「係喎！你哋咁生面口嘅？唔好打劫我噃，我識恆宇仁龍拳架！」說罷用拐杖敲了敲地下。
「佢係嬌嬸！」呂瑰又哭又笑：「佢係阿廢嘅媽媽！」